"Eh Nasir, Lu liat tuh tangan babe lu, daripade bengong, kasih bolpen kek babelu, kayaknye babe lu pengen nulis surat wasiat tuh" katenye Bokir. Nasir langsung ngibrit nyari kertas ame bolpen buat babenye, kali aje dapet warisan tanah di Condet pan lumayan. Pake sisa tenaganye, Engkong Jalu nulis dikertas ampe' gemeter, abis gitu kertasnye dikasiin ke Bokir. Ame Bokir, surat wasiatnye langsung dikantongin. "Entar aje bacenye, kagak enak baca surat wasiat sekarang, pan babelu belon koit" katenye Bokir ngebisikin Nasir. Akhirnye Engkong Jalu jadi koit dah. Inna Lillahi. Orang sekampung pade nangisin, soalnye Engkon Jalu biarin galak tapi baek ame tetangge.
Pas sukuran tujuh arinye Engkon Jalu, Bokir diundang lagi ame Nasir buat ngebacain doa lagi. Abis bacain doa, Bokir baru inget kalo die dititipin surat wasiat ame almarhum Engkong Jalu. Untungnye, Bokir make baju taqwa nyang minggu kemaren dipake waktu Engkong Jalu koit, pas dirogoh, surat wasiatnye masih ade dikantongnye.
"Sodare-sodare sekalian, ade surat wasiat titipannye Engkon nyang belon sempet ane baca. Kalo kite inget masa idupnye Engkong, kayaknye sih isinye nasehat buat kite semue. Nyok kite baca bareng-bareng suratnye ye" kate Bokir.
Begitu abis ngebuka lipetan surat wasiatnye, tau-tau GUBRAK !!! Bokir ngejeblak jatoh pingsan.
Pas dibaca ame Nasir, ternyate isi suratnye cuma begini "HEH Bokir !!!! Lu bedirinye sonoan dikit napa, jangan nginjek selang oxigen gua !!!!!"